Buka ea Tsebo Matšasa e tla thusa bohahlauli ba Lesotho haholo

Buka ea pale ea toropo ea Maseru, e ntseng e ngoloa ke monghali Tsebo Matšasa, e tla tsoela bohahlauli ba toropo ea Maseru molemo o moholo, ho itsalo batho ba mo utloileng ha a manolla likateng tsa buka e tlang ho phatlalatsoa ka Hlakubele ea selemo se tlang.

Phatlalatsong ea hae ea litaba tsena, monghali Matšasa o itse o ile a qholotsoa ke bana ba sekolo sa Limkokwing ba lithuto tsa bohahlaoli le tlhokomelo ea baeti ha a tla qalella ho ngola buka e tlang ho baloa e le maqephe le ka marang-rang.

Boholo ba litaba tsa buka eo, bo ipapisitse le lietsahala ’moho le meaho e mathuleng a tsela e kholo ea Kingsway, e leng e parolang motse-moholo oa Lesotho, Maseru. Boholo ba litaba tsa buka eo, bo tloha ho thehoeng ha toropo ea Maseru, ho tla fihla boipusong le kamorao ho teng.

Tsebo Matšasa ke moqolotsi oa litaba ea seng a itšebetsa ka khoebo ea boeti le bohahlauli,e atlehileng haholo,e bitsoang Likatola-Horse Riding Tours, e fumanehang Qeme Ha Teko.