Monna o re mapolesa a Mokhotlong,a hanne ho mo bulela nyeoe

Monna oa Ha-Karabo Rafolatsane, Mokhotlong, o re sepolesa sa setereke seo, se hanne ho ’mulela nyeoe ea ho khakhathoa ke banna ba motse oa habo ba neng ba mo etselelitse ho sona ka le reng o buletse linku tsa hae sekete, mathoasong a khoeling ena.

Monghali Fako Matia o re o se boleletse hore o ne a ile sekete ho ea lefella linku tsa hae tse leshome le metso e robong, tse ileng tsa tšoarelloa le tsa batho ba bang leboelleng, empa eare a sa li bala, monna e mong oa motse oo, a re a hle a khakhathoe,hobane ke letona la morena.

O re mapolesa ha a ka a mamela litaba tsa hae, a re ha ho na nyeoe moo, ka baka leo, a li qhala le hoja eena a ne a batla ho bula nyeoe ea ho khakhathoa, empa a se ke a fuoa monyetla o joalo.

Leha ho le joalo, phala ea sepolesa, Supt. Mpiti Mopeli, e tšepisitse Lehakoe la Litaba ho le batlela bonnete ba se etsahetseng, sepoleseng sa Mokhotlong, ’me e tla khutlela ho lona.