Bahoebi ba banyenyane ba re ba jesetsoa khoebeleng ke ba melata Qachaseneke

Bahoebi ba banyenyane ba setereke sa Qachaseneke, ba re ba jesetsoa khoebeleng ke ba melata, ba bonahalang ba ntse ba kenella ka har’a metse ba ba nkela khoebo.

Ea buileng lebitsong la bona monghali Masoabi Lipholo(Mosaku), o re melata, e se e butse likhoebo tse tšoanang le tsa bona, ka ha le eona e se e qotsa liphofo, e li rekisa ka theko tse tlase.

O re boemong boo, ba lekile ka makhetlo ho kopa ’musi oa setereke seo, ho ba namolela ho melata hore e khutlele likhoebong tseo e li laoletsoeng, empa, ha ho nko ho tsoa lemina.

Leha ho le joalo, ’musi oa setereke seo, monghali Ndiwuhleli Ndlomose, o re o ne a lokela ho kopana le balli ka Laboraro lena, empa ka baka la maemo a leholimo, ba hlolehile, ho se ho tla boleloa letsatsi le leng la ho ea khokhohanya puo.