Mosali ea lilemo li 34 ke tona-kholo ea Finland

Ka Laboraro lena naheng ea Finland, Sanna Marin ea lilemo li mashome a mararo a metso e mene, o phatlalalitse lekhotla la hae la matona a 19, ’me 12 ea bona ke basali.  

Puso ea hae ke ea kopanelo ea makhotla a 5 kaofela a eteletsoeng pele ke basali. Ba 4 ba baetapele bao, ke basali ba ka tlase ho 35 ea lilemo.  

Sechaba sa Finland ke limilione tse hlano, athe Lesotho ka makhotla a mane feela pusong ea batho ba limilione li peli, le kiba-kiba ka phiphitha ea matona a fetang mashome a mararo, ka moruo o tetemamang. 

Naha ea Finland moruong e bulehile ho ea ka World Economic Forum ’me e hlaha boemong ba bo leshome le motso o mong lefatšeng.