Moimana ea lulang Ha-Seoli, Maseru, o tokhotsoa ka kharafu ke sepolesa sa Ha-Thamae, ka le reng o qhalile kemaro

Lesotho Mounted Police Services
Picture courtesy of Lesotho Times

Mosali ea lulang Ha-Seoli, Maseru, o re mapolesa a Ha-Thamae, a ile mo tokhotsa ka kharafu le phafa ea polasitiki ka pelaello ea hore o qhalile kemaro, bosiung ba Labohlano le fetileng.

Bokang Rapotsane o re sena se latela hore ha hae ho fihle mahokela a motse oo, a re ke ’melaelloa oa taba e etsahetseng letšehareng la letsatsi leo, le hoja, a ne a sa ’molelle hoo e leng hona, a mo isa moreneng.

O re ha ho fihloa moreneng mahokela a tlaleha hore o ntšitse mpa ea likhoeli tse tharo, ke moo a ileng a mo hlahloba botenng ba morena, empa a seke a fumana letho ha ese lebese le tsoileng matsoeleng.

O re mapolesa a Lithoteng a ile a fihla le oona a mo hlahloba, a fumana hore bokhachane bo ntse bo le teng, empa lehokela le leng le mohlokomeli oa malaene, ba a ema le oona thokoana, ba itšeba.

Bokang o re qetellong o ile a laeloa ho kena koloing ea mapolesa, a ea ka eena sepoleseng sa Ha-Thamae, moo a ileng a botsoa lintho li hana ho fela, a kenngoa setokising, ’me bosiu a ntšoa ke lepolesa la monna le ileng la mo kakata ka kharafu mahetleng, thekeng le libonong.

O re o lokolotsoe ka Moqebelo o fetileng ka mor’a hore a isoe ngakeng Queen II, ke mapolesa ao ho ea inetefaletsa hore e fela e ntse e le moimana,’me ha fumaneha ho ntse ho le joalo.’Mathabo