Lesotho le na le metsi a mangata ho feta litlhoko tsa lona

Boithuto ba litsebi tsa paballo ea metsi le mobu bo supa hore Lesotho le na le metsi a mangata ho feta tlhoko ea lona, e le a ka monngoang lehlabatheng la noka, a pompeloa hohle moo a hlokoang.

Monghali Thuso Green a bua Probonong ea Labobeli lena, o itse ka nako e telele metsi a Maseru le a likampo tsa Lesotho, a ne a monngoa lehlabatheng la linoka tsee likampo tseo li ahiloeng holim’a tsona, ka lebaka leo, ha ho ntho e ka sitang hore tsela eo ea ho fumana metsi, e sebelisoe molemong oa metse le masimo a Basotho.

Moeti oa lenaneo, Ms Mookho Monnapula, o itse se lokelang ho etsoa ke hore merero le meralo ea pokeletso le paballo ea metsi e kopaneloe ke mafapha ohle a sechaba,’me litsebi li hlonephe litsebo tsa sechaba se bokelletseng litsebo tsa sona ka ho phela sebakeng se le seng nako e telele.

O bile a re litsebi li lokela ho etsa lintho tse ka khothatsang sechaba, sa bona molemo oa tsona ka nako e khutšoanyane, e le tse ntlafatsang bophelo ba sona.

Lenaneo le ne le qhololitsoe ke litlhaloso tse neng li ile tsa fanoa sebokeng sa beke ena sa mekhatlo e ikemetseng se ntseng se tsoelapele, Holong ea Liboka ea ’Manthabiseng.