Bamameli ba Lenaneo la lipapali, ba itse Mohapi a tlohelle ho sebetsa litaba ka khalefo

Mongoli-kakaretso oa LeFA, monghali Mokhosi Mohapi, o re sehlopha sa Mozamane FC, se lokise liphoso tsa sona se latele melaoana ea ngoliso ea FIFA, e reng ho bapalisoe bana ba lilemo tse ka tlase ho mashome a mabeli,’me Mozamane e tlaitse thifa ka ho se sebelise libapali tse hlokoang, ebile e bapalisa tse robong ha li lokela hoba leshome le motso o mong.

Mohapi o re mongoli oa sehlopha o fumane melaetsa e mo eletsang ho lokisa liphoso tse hloauoang ngolisong ea libapali tsa sona, empa puisano eo ea qetella ka mahlapa puisanong ea hae le Motlatsi Maboko, ee itseng ha a botsoa ka oona a re a ka se bue letho ka oona lenaneong la Lipapali ho Moafrika Fm.

Ho sa le joalo, motlatsi oa mongoli oa sehlopha, monghali Lepota Naatsoane, o re ba ngolisitse libapali pele ho nako ea ho koala, ka marang-rang, litaba li ne li sallane le LeFA ho netefatsa ngoliso, ha e le melaetsa e boleloang ke Mohapi, ha ba e fumana.

Lepota o re ba ile makhetlo a fetang bonngoe Bambatha, ho lata likarete tsa libapali,’me ho ntse ho se nko ho tsoa lemina, feela mosebeletsi oa LeFa a itse li teng.

Motlatsi oa Mookameli oa Sehlopha, monghali Motlatsi Maboko, o tiisitse taba ea mahlapa puisanong ea hae le Mokhosi Mohapi, ’me o sa lebeletse komiti ea ADMACO ho hlophisa khatiso ea bona, pele e kena litabeng tseo.

Bamameli ba Lenaneo la lipapali, ba itse Mohapi a tlohelle ho sebetsa litaba ka khalefo, kaha seo se ts’abisa botsamaisi ba lihlopha ho mo atamela, ho otlolla moo ho nang le bothata.