Tona-kholo ea Lesotho e re bobolu, lipolao tsa bana, basali le maqhekoana, li ts’oentse ‘muso.

Thabane, PM
Lesotho Prime Minister Dr Motsoahae Thomas Thabane

Tona-kholo ea Lesotho Dr. Motsoahae Thabane e re ’muso o tšoentsoe ke lipolao tsa bana, basali le maqhekoana hammoho le bobolu bo iphileng matla,’me tsena o li buile pulong ea ’moka oa bo mashome a mabeli, oa matsatsi a mararo, oa mekhatlo e ikemetseng, holong ea Liboka ea ’Manthabiseng, Maseru, ka Lapele lena.

Dr. Thabane o re ka baka leo,’muso o se o qalile selekane le mekhatlo e ikemetseng ho loantša le ho nena bobolu ka hohle, a ba a etsa thapeli ho sechaba sa Basotho ho kenya letsoho,toantšong ea bobolu le hore baetellipele ba sona lipolotiking, ba fetole tsela ea bona ea tšebetso.

Ho sale joalo, ka mor’a puo ea tona-kholo, sechaba se bileng ’mokeng oo, se ile sa lula ka lihlotšoana tse tharo, moo se neng se seka-seka pheto-phetoho ea boemo ba leholimo, ha ka lehlakoreng le leng, ho ne ho tšetšethoa litaba tsa batho ba nang le bokooa ba mefuta e fapakaneng.