Sekata o tšoela phala ea LCD, o nka pene ea lekhotla

Teboho-Sekata

Mohlomphehi Mohlophisi e Moholo, o re Moafrika Fm e thabetse ofisi e ncha ee monghali Teboho Sekata a keneng ka hare ho eona mafelong a beke e fetileng, ea bongoli bo boholo ba lekhotla la Nonyana e kholo.

O re ke boemong bona, moo monghali Sekata, a tlang ho nolofalloa ke ho tseba litaba tsohle tsa lekhotla la habo kaha litokomane tsohle tse tsoang le tse kenang li le ofising eo.

Mohlomphehi Mohlophisi e moholo, o re o lumela hore monghali Sekata o tla ’ne a be le mafolo-folo joalo ka ha a ’nile a ba le oona nakong ee e neng e le phala ea LCD, ka nako e telele.

Tsena o buile a ipapisitse le hore,moparamente oa Semonkong monghali Sekata, e se e le eena ea tšoereng pene ka khetho ea seboka se seholo se bileng Hlotse Leribe, mafelong a beke e fetileng.

O kene ofising ea bongoli a hlahlama monghali Selibe Mochoboroane ea neng a e lahle lilemong tse peli tse fetileng, a ea theha mokha oa Sethala sa Moruo, moo e leng Moetellipele teng.

Pele ho monghali Mochoboroane, bona bongoli boo ba LCD, bo ne bo lahloe ke Ms Keketso Rantšo, a ea theha lekhotla la Bolekana lee entseng a le eteletsepele.

Monghali Sekata o tšepisa hore ha a na etsisa bao, empa o tla sebeletsa ho holisa lekhotla la Nonyana e Kholo, ’me o tla tsoelapele ho sebetsa le Moafrika FM, joalo ka pele.