Baahi ba ts’oenngoa ke ho hloka tlhokomelo ha ngoanana ea lilemo li 9, Mokhotlong

Baahi ba Ntlholohetsane Ha-Ntlibi Matete Mokhotlong, ba re ba tšoentsoe ke bophelo ba ngoanana ea lilemo li robong ea bonahalang a se na tlhokomelo e ntle lapeng la habo.

Ea buileng lebitsong la bona ebile e le lehokela ’Mamohapi Popi, o re sena se latela hore ho fihle ngoana ea boletsoeng, a re o balehile litšoso tsa malome oa hae ea itseng o tlo ’molaea, ha a tla baleha, ka Sontaha se fetileng.

O re ba ile ba mo isa sepoleseng, seo ho utloahalang se ile sa ’matlisa e mong oa baamani le eena, empa hamorao, a khutlela motseng oa bona, moo ba ileng ba mo isa moreneng, ea ileng a mo busetsa mapoleseng. Morena Ntlibi Matete o tiisitse litaba tsena.