Ramophato o re o tla lokolla moshanyana ea titimetseng ka M2000.00

Lelapa la Madona le Maputsoe Phuleng Ha-Nyenye, Leribe, le re le tsietsing ea ho lefa mong’a mophato ea le batlang likete tse peli tsa Maloti, ha le re a lokolle mor’a lona ea titimetseng, ha le na mokhoa oa ho mo bolotsa. 

’Matlala Madona, o re sena se latela hore khaitseli ea hae e titimelle Hleoheng Ha-Polaki,’me ba tsebisoa ke ramophato hore nakong ea matsatsi a mabeli ba bolele hore na ba bolotsa ngoana kapa che, empa ba itela hore ba tla hloleha.

O re ramophato o itse ba lokela ho lefa likete tse peli tsa Maloti hore ngoana eo a tle a lokolloe, eare ha ba re ha ba na eona, a re ha se ntho e ka etsahalang ea ho lokolla ngoana.

Ramophato, monghali Mashoai Lebotsamang, o re ba habo ngoana ha ba ba le tšebelisano e ntle le eena, ka ha itse ha a ba tsebisa litaba tse boletsoeng, ba ikhethela ho se ee lipuisanong,’me mohlang ba ileng, ha a ba tšetlehela mabaka, ba bonahala ba se na khanyetso.

Ho feta moo, o re ha ba khutlela ho eena, ba bolela hore ha ba na chelete eo, o ile a ba bolella hore, leha ba sa e lefe, ngoana ha a na ho lokolloa leha e le ho phatsoa, ho fihlela lelapa le tlile lipuisanong tse nang le boikokobetso.