Mok’hanselara oa Ha-Thetsane, Maseru, o tšoenngoa ke lipolao tsa batho tikolohong eo.

Mok’hanselara oa Ha-Thetsane Maseru, o re litlolo tsa molao tse tikolohong eo, li hloka hore mapolesa a hle a itokisetse ho lula a kena ntlo le ntlo a thusana le sesole, ho phahla batho ba se nang litokomane tse ba lumellang ho ba moo.

Monghali Tlali Lebesa o re o bua sena a ipapisitse le lipolao tsa batho ka sehloho tse seng li nkile mojaho hobane ho tloha mathoasong a khoeli ena ho se ho timetse batho ba supileng, bao boholo ba bona ba bolailoeng ka sethunya le litlolo tse ling tsa molao.

O re ka lebaka lena, sesole se lokela ho jela paate kaha ho bonahala litlolo tseo tsa molao li etsoa ke batho ba tlohileng metseng ea habo bona, ba hanang ho hlahisa mangolo a ba pakang mareneng a tikoloho eo, ’me o lumela hore pheko e tla ba teng.

Litaba tsena o ne a li bua pitsong e neng e epiloe ke sepolesa sa Ha-Thetsane, se neng se batla ho bua le sechaba le mahokela ka mekhoa e ka etsoang ho laola tlolo ea molao, ka Sontaha se fetileng, lebaleng la Lifefo.