Lefapha la phano ea litokomane tsa botho le hloloa ho araba litaba tsa ho batla ho falla liofising tsa poso Mafeteng le ea moahong oa Sacura

machabana lemphane
Principal Secretary, Ministry of Home Affairs, Ms. ‘Machabana Lemphane Letsie

Lekala la Tsa-Lehae ka lefapha la Phano ea litokomane tsa mantlha tsa botho, le hlotsoe ho fana ka mabaka a etsang hore le batle ho tloha meahong ea poso e Mafeteng le e’o hira moahong oa Sacura, nakong ee le neng le botsoa ke PAC, ka Lapele la beke ena.

Lekala le hlotsoe ho bolela ka Mongoli e Moholo oa lona, ’Machabana Lemphane Letsie hore le ilo lefa bokae moahong oo, ha oa poso e le bokae.

Le ha ho le joalo, Mongoli e Moholo oa Lekala o itse litaba tsa litefo ha a li tsebe ka hlooho,’me taba ea ho fallisoa ha liofisi, e hlalositsoe ke Ms. Puleng Mangamthe e-so netefatsoe le lefapha la habo la molao.

Lekala lena le tla boela le bitsoa ke PAC ka nako e tla boleloa, ’me ka Labobeli lena ho tla mameloa litaba tsa Lekala la Puso ea Libaka le Borena hammoho le Lekhotla la Motse-moholo Maseru,(MCC).