Babolai ba mok’hanselara ba balloa liqoso, le ea bosholu ba lifono, Mohalesuku

Lekhotla la ’Maseterata oa Mohalesuku, le baletse banna ba babeli le mosali a le mong, liqoso tse peli e leng ea ho bolaea Mariam Senooe oa Qalakheng 2, ha khoeli ea Mphalane e ne e hlola matsatsi a robeli, le ho nka ka likhoka fono ea hae le ea setloholo sa hae.

Lehlohonolo Ranoha ea lilemo li 29 oa Seforong Quthing, Sebongile Letšaba oa tse 22 oa Metsi-Masooana le Poulo Kulumane oa tse 37 oa Mopooane, ba tla boela ba hlahella lekhotleng leo ha khoeli ena e tla be e hlola matsatsi a mashome a mabeli a metso e mehlano. 

Le ha ho le joalo, sechaba sa Qalakheng 2, Ha-Thabiso Pebane, Mohalesuku, se re se leboha Molimo o thusitseng sepolesa sa setereke seo, ho qhautsa baqosuoa ba boletsoeng.

Mok’hanselara ea seng a bolokiloe, o ne a fumanoe a le ka har’a letamohali la mali, a fasitsoe maoto le matsoho a se a timetse, ha khoeli ea Mphalane e ne hlola matsatsi a robeli, monongoaha. Maseterata ke Kolobe ha Mochochisi e le Mathe.