Paramente e hlakotse molaoana o thibelang Basotho ho rekisa boea moo ba ratang

Lesotho Parliament

Molaoana o khopo, o neng o thibela Basotho ho rekisa boea ba bona limmarakeng tsa khetho ea bona, oa ba qobella ho isa boea boo ho Lechaena le qetelletseng le sa lefa ba bang, ha babang ba re ba phoqiloe feela, o hlakotsoe ke paramente ea Lesotho ka Labobeli lena.

Letona le ikarabelang le bile le laetsoe ke eona paramente hore le be le entse molaoana o mocha o lumellanang le boemo bo bocha, nakong ea matsatsi a supileng ho tloha ka Labobeli lena.

Hape, paramente e laetse hore ’muso o etse bonnete ba hore Lechaena leo, le lefa bohle bao le ileng la nka boea ba bona, ha le hloleha, ’muso o lefe Basotho bao ka ha le ne le ile la tlisoa ke ’muso naheng ena.

Ntlha ea boraro e bile hore ho thehoe sehlopha sa litsebi tsa boea tsa Basotho, se tlang ho eletsa ’muso hore na boea bo ka sebetsoa joang naheng ena, ka tsela e ka tsoelang Lesotho le Basotho molemo.