Matekane o re bahoebi ba se nyahamisoe ke liphoso tse fetileng tsa LCCI

Monghali Sam Matekane o re bahoebi ba Basotho ba se nyahamisoe ke liphoso tse fetileng tsa Mokhatlo oa Lesotho oa Khoebo le Mesebetsi e Meholo (LCCI), ba khutlele ho oona, ba lefe liabo, ba tsebe ho kopanela khoebo le khoebisano e tlang ho ruisa moruo oa naha ena.

A bua ho Rents’alephola ka Labobeli lena, mong’a MGC o itse likhoebo tsa hae ke litho tsa LCCI joalo ka likhoebo tse ling, o mpa a filoe boemo ba ho etellapele khoebo ea Lesotho lipakeng tsa Lesotho le Canada.

O bile a re khoeli ena e tla fela a se a tsoa Canada lipuisanong tse tlang ho qetella ka ho tekenela litumellano tsa khoebo le khoebisano lipakeng tsa Lesotho le Canada mafapheng a fapakaneng.