Afrika Boroa e tšoere monna ea belaelloang polaong ea batho ba 4 Soweto

Monna oa Lesotho o tšoeroe ke mapolesa a Gauteng, Afrika Boroa ka pelaello ea ho bolaea batho ba bane, Soweto, ka La-pele la beke ena, a le kahar’a koloi ea baeti haufi le mokoallo oa Grasmere, a e-na le sethunya se hlahletseng likulo.

Sebui sa mapolesa a Gauteng se re pelaelo ke hore monna eo, le e mong ea ntseng a e-s’o tšoaroe, ke babolai ba hireloang ho etsa joang.

Se itse ha ba e-s’o be boemong ba ho pharalla ka litaba tseo, ntle le hore e bile mosebetsi o bonolo ka ha ba ne ba sebetsa ba ipapisitse le monyenyetsi o tšepahalang.

Bamameli ba Probono ea MOAFRIKA ka Labobeli lena, ba itse ho hlile ho na le Basotho ba ipopileng bokoeta ka Afrika Boroa, bao ba bang ba bona ba phelang ka ho hiroa ke batho ba bang, hore ba ba bolaele ba bang ka sehloho.