Mookameli oa sekolo sa St James o holeha ngoanana, ka lebaka la botlolo ea morutoana e mong e lahlehileng

Mosali oa Semonkong Ketane Ha-Tsiane, Maseru, ea lulang Ha-Seoli, o re ha a khotsofalla kotlo e filoeng morali oa hae ke mookameli oa sekolo se phahameng sa St James Maseru, ea ho fasoa ka ketane e bileng ea notleloa ka mpone ke ile, ka Lapele la beke ena.

Lineo Majoro, o re ka mor’a ho tsebisoa hore ngoanana o notlelletsoe ka phaposing e ’ngoe sekolong, o ile a fihla teng a fumana litaba tse seng li boletsoe, ho bile ho e-na le tichere e itseng e rometsoe ho ea lokolla ngoanana, e ee le eena ha eona.

O re tichere e ’molelletse hore ngoanana o filoe kotlo eo hobane a lahlile botlolo ea morutoana e mong, ka hona, o lokela ho e lefa, ’me ho sa entsoe khang, ntat’a ngoanana a fihla le e ncha eo tichere e ileng ea e hana ea re e laetsoe ho amohela chelete feela.

O re leha ho le joalo o bile a lefa lekholo le mashome a mahlano a Maloti.Puisanong le Lehakoe la Litaba mookameli oa sona Thato Koeete o itse; ‘nkeke ka bua litaba tseo li-radiong, ha u li hloka, ikise sekolong’.

Sefefo se fefola matlo, thepa ea senyeha

Sefefohali se bileng Maputsoe Ha-Maqele, Leribe ka Lapele la beke ena, se fetile ka marulelo a malaene a robeli le mek’huk’hu e ’meli,’me thepa ea bahiri ea sala lepala-paleng.

Mofuputsi oa litaba tikolohong ea Maputsoe, monghali Sepeka Makoae, o re sechaba se ile sa phalla sa hleka thepa e neng e le ka matlong ao, ho e balehisetsa pula, empa e ’ngoe e ile ea senyeha.

O re leha ho le joalo, o ’nile a fumana litlaleho tse malebana le tšenyo e entsoeng ke sefefo seo, o bile a re ha a ntse a tsamaea ka har’a motse o bone lerakohali le neng le lokela ho ruleloa, le helehile.

Leqhekoaana la Khubetsoana Ha-Hlathe Majara, le tingoa litsiane tsa botsofali ka le reng mochini o le tlotse

Leqhekoana la Khubetsoana Ha-Hlathe Majara, Berea, le re le sitiloe ho tšoasa litsiane tsa lona tsa botsofali ka ha le boleletsoe hore mochini o ngolang mabitso, o le tlotse, ka Lapele la beke ena.

Nkhono ’Manapo Maranyane, o re ka mor’a hore bahlanka ba mo tšele ka metsi a batang, ba ile ba re a ee ho e ’ngoe ea liofisi tsa ’muso, moo a ileng a tšerema mangole ha a tsebisoa hore litsiane tseo li se li tla menahanngoa khoeling e tlang.

Maparamente ha ananele tlaleho ea NLF

Boholo ba maparamente bo ile ba bonahala bo sa ananele tlaleho e fanoang ke komiti ea National Leader’s Forum ka ha bo re ho bonahala e teka maikutlo a eona e seng a sechaba,’me tsena ke tsa Labobeli lena.

Ho feta moo, a mang a maparamente a itse a ne a lebeletse ho buisana le ho lumellana e le litho tsa ntlo hore na a reng ka maikutlo ao a sechaba.

Sena se latela hore ho tekeloe maparamente lethathamohali la maikutlo a sechaba holim’a lintlha tse lokelang ho hlopchoa bocha mafapheng a fapakaneng a sechaba.

Baahi ba Maputsoe ba isa monna ee ba sa mo tsebeng kokelong

Monna ea sa tsejoeng, o ile a potlakisetsoa setsing sa bophelo ka mor’a ho fumanoa a oele ka sefahleho a ntse a e-tsoa makoeba ka linkong, a le haufi le noka ea Mohokare, motseng oa Maputsoe Ha-’Mathata, Leribe, ka Labobeli lena,‘me baoki ba mo hlahlobileng ba re sesosa ke lithethafatsi.

’Maretšepile Tsiki, o re ka mor’a ho hlaba mokhosi qhooeng ena, banna ba motse oo ba ile ba mo kakasa ba re ba mo potlakisetsa teng, e le ha sepolesa se itse ha se na koloi, empa mosamaria ea molemo o ile a mo nka ka koloi ea hae ho ba ephola.

‘Malekhobanyane o re satane o teng ka paramenteng

Moahi oa Ha-Motemekoane Maseru, o re o ikutloa a imolohile moeeng ka mor’a ho nelehelana ka lengolo le kopang ho etsa thapelo ka har’a paramente hang hore puso e fetohe, ka Labohlano la beke e fetileng.

’Malekhobanyane Lekhobanyane o re o ne a etse kopo ka mongoaha oa 2015,’me ea amoheloa ke mosali e mong paramenteng, ho fihlela le holimo ha ho nko ho tsoa lemina. A boela a e ngolla ka 2017,le teng ha thola tuu!

Koetliso ea PDC e tsamaile hantle, letsatsing la pele la eona

Letsatsi la pele la koetliso ea PDC, e leng moralo oa ntlafatso le kholiso ea likereke, e tsoetsepele hantle moo barupeli ba tsoang Amerika ba ileng ba tšoella baetellipele ba likereke tse fapakaneng tsa Lesotho malebela, ba ipapisitse le katleho ea kereke e bitsoang Saddleback, ea Carlifornia, USA.

Rev Dr Steve Newman le Rev Steve Jordan, ba simolotse ka ho supa metheo ea bibele ee ha e ka lateloa ke bakereki, e ka tlisang kholo e kholo ea liphutheho, e leng taelo e kholo, taelo e kholo le boinehelo ba baetellipele ba kereke.

Ka lehlakoreng la boruti le boetellipele, barupeli ba supile ka litemana tsa bibele hore banna ba Molimo ba lokela ho nena bohlola, lerato la leruo, matla kapa setumo.

Moruti John Maphephe, e leng mohokahanyi oa thupelo ena, o re sebaka se sa ntse se le teng bakeng sa ba ileng ba haelloa ho tla thupelong ea kajeno. O re ho sebeletsoa Great Tabernacle, Full Gospel Church, Ha Thetsane. 

Rev Maphephe o re qetellong ea thupelo ena. Likereke li tla ba boemong ba ho araba liqholotso tse malebana le khaso ea evangeli, phenyo ea bofuma, mafu a sa phekoleheng le bokamoso bo hlakileng ba batho ba bacha, e sebetsa le mebuso.

Mobusi o eletsoa ho balehela bohale ba Molimo esere a ts’oana le Faro

Mokhethoa oa Malingoana ka Lapele la beke ena, o ile a eletsa babusi, hore ba lemohe, esere ba qetella joalo ka mobusi oa Ekhepeta, Faro ea sa kang a tseba Josefa, ea neng a thatafalelitse bana ba Iseraele bophelo mafapheng ohle.

O ile a fana ka litemana tse peli tse tsoang khaolong ea bone ea Exoda, tse balehang joana: u tle u re ho Faro, hobane ho thoe ke Jehova: Iseraele ke mor’a oa ka oa letsibolo, ke re ho uena, lokolla mor’a ka a ee ho ntšebeletsa, empa ha u hana ho mo lokolla, bona, ke tla bolaea mor’a oa hau oa letsibolo.

Bohanyetsi bo thibetse setšoants’o sa molao oa likhokahanyo ka paramenteng

Bohanyetsi ba Lesotho bo ile ba ema khahlanong le ’muso, ka Lapele la beke ena lintlheng tse tharo, ea molao oa likhokahanyo, ea ntlafatso ea meputso ea maparamente le ea kopano ea litho tsa matlo a mabeli a paramente ea Lesotho.

Ntlheng ea pele maparamente a ile a hanana le hore Lekhotla la Likhokahanyo le etsetsoe molao o le lumellang ho fana ka lithentara ho likoporasi tse kholo tsa likhokahanyo e leng ETL le VCL feela, ho tingoe baiketi ba maemo a ka tlase ho likoporasi tseo.

Ntlha ea bobeli e bile malebana le ntlafatso ea meputso ea maparamente e neng e khothaletsoa ke ’muso ka komiti ea paramente e ikarabelang, le hona moo, maparamente a ile a re ha ho nonyana e ka llang joalo, eseng sechaba se lla ka lichelete tsa sona tsa boea, meputso ea matichere, litšebeletso, joalo joalo.

Ha li ea maselalibata, boetellipele ba bohanyetsi ba ema ka le reng litho tsa matlo a mabeli a paramente li kopane, thupelong ea Tlhophobocha, ka Labobeli la beke ena, ho latela bohlokoa boo ba bo boneng ho ea ka Lapele lena, e neng e kenetsoe ke litho tsa Lekhotla la Sechaba feela.

Tšebeletso ea ho heletsa marako a Jeriko e fetoha karabo ho kereke ea Moshoeshoe

Phala ea kereke ea Moshoeshoe, e re ka mor’a hore Moshe le Moprofeta oa Basotho ba joale a senoleloe ka ho oa ha marako a Jeriko a le thabeng ea Molimo Tsereoane khoeling e fetileng, a kereke ea habo a fela a oele. 

Moruti Thabo Nthako o re o ipapisitse le hore ka mor’a ho pota-potoa ka makhetlo a supileng holo ea nkhono ’Maoetsi, boriki bo neng bo sitisa kereke ea habo ho fumana tokomane ea setša, bo rarollehile. 

O re tšebeletso eo ea ho heletsa marako e ile ea ’mulela mamati a hore a kopane le letona la Puso ea Libaka le Borena ho tšohla mathata a tobileng kereke ea habo ho fumana see e se lokelang.