PAC e kopana le makala a Thuto le la Bophelo

Komiti e shebaneng le tšebeliso ea lichelete tsa Sechaba, PAC, ka Lapele lena, e ile ea kopana le Lekala la Bophelo holim’a lintlha tse tharo, ’me e ka sehlohlolong, e bile ea ho heletsoa ha meaho ea sepetlele sa Queen II.

Motlatsi oa Mongoli e moholo oa lona monghali Hlompho Mpeta, o ile a bolella komiti, hore ka baka la tlhokahalo ea limilione tse mashome a mararo tsa Maloti, tse neng li hlokoa ke Lekala la Mesebetsi e Meholo ea sechaba, la bophelo, le ile la kopa sesole ho le thusa ho heletsa,’me sa lumela, ntle ho chelete.

Leha ho le joalo, monghali Tumisang Mokoai lebitsong la Queen II, o ile a hanyetsana le monghali Mpeta ka le reng, ho na le litaba tsee a li khoaelang, ha a lokela ho li beha pooaneng, kaha taba ea hore sesole ke sona se tlang ho heletsa meaho eo, e ile ea latoloa kopanong ea Lekala leo la Bophelo.

Ho feta moo lintlha tse ling tse peli e leng tsa kabo ea mosebetsi oa ho pheha le ea mangolo a tumello ea tlhahiso ea matekoane, ha hoa ka ha kenoa ho tsona. 

Ho sa le joalo, hona letsatsing le boletsoeng, komiti e ile ea boela ea kopana le Lekala la Thuto, ho utloa ho lona hore na le se le khathile tema e kae tokisetsong ea ho lefa matichere.

Tlhaloso ea Lekala tabeng ena, e itse ha ho e-so be le lethathamo le lefuoang, empa Lekala le mothating oa ho etsa joalo, hobane ho fihlela joale, matichere a sekete, makholo a mane le mashome a mararo a metso e mehlano, ho se ho netefalitsoe hore a ka lefshoa, le hoja ho e-so etsahale.

 

Boemong boo, komiti e ile ea etsa qeto ea hore Lekala le e’o sebetsana le ho lefa matichere, ’me ka Labobeli lena, le khutlele komiting ho ea e fa litaba tse utloahalang, ho seng joalo, e tla nka khato e ’ngoe.