MaDC a re Mokhothu a khitle tente, a nyofe leloko, taba li fele

DC supporter 

Moetellipele oa DC o tlalehoa ke phala ea mokha oa habo, a laetsoe ho khitla tente le ho nyofa leloko ka paramenteng, ha e ba banna le basali ba habo ba bohanyetsi, ba ka hana ho ema le eena tšisinyong ea hore IEC e khaotse ho kheketla mabatooa a ka thabeng.

A bua ho Rentšalephola ka Lapele la beke ena, monghali Serialong Qoo o re taba ena e latela hore ka makhetlo a mabeli, tšisinyo tsa hae li chechisoe ka paramenteng, ho fetisoe tsa banna ba habo, tse tšehetsoang ke moetellipele oa Nonyana e Kholo.

Monghali Qoo o re tšisinyo ea pele, e ne e le e reng ho hlakoloe molaoana o thibelang Basotho ho rekisa boea limmarakeng tse bulehileng, tsa khetho ea bona.

Ea bobeli ea e-ba ena ea mabatooa a ka thabeng. O re ea pele e ne e chechisoe ka ea Monghali Mothejoa Metsing le tonakholo Motsoahae Thabane.

Ea bobeli, e leng ea bekeng e fetileng, o re ke moo monghali Lekhetho Rakuoane, a tšehelitsoe ke Monghali Metsing, ba sisintseng hore ho hlomathisoe molao oa motheo, ho thibeloe tonakholo ho bitsa likhetho tsome ha e qabane le maparamente.

O re moetellipele oa Potoana o ile a kopa hore tšisinyo, e kenyelletse hore oona molao oo, ho hlomathisoe le tabeng eo ea hae ea mabatooa, empa a tlakoa ke tse ling tsa litho tsa ntlo, tsee Potoana e neng e hopala hore li ema le eena.

O re Monghali Mathibeli Mokhothu o buile phatlalatsa libokeng tsa hae tsa potoloho mabatooeng hore ha tšisisinyo eo e ka boela ea hanoa, o tla etsa ntho e bonolo, e leng ho iphutha litabeng tsa banna le basali ba habo, ba itsoellepele ba le bang, ba atleha kapa ba sa atlehe.RK.