Sepolesa se phutha litopo tse hlano Ha Molungoa

Sepolesa sa Morija se ile sa phutha litopo tsa lelapa le le leng, sa monna le litloholo tsa hae tse ’ne, Masite Ha-Molungoa, Maseru, tsee beng ba tsona ba bolauoeng ka ho thunngoa ba robetse, ke batho ba sa tsejoeng, bosiung ba Labone lena.

Mofani oa litaba tsena, o re baahi ba tsebile sena ka mor’a hore e mong ea tloaetseng ho fapohela lapeng leo, a fumane monyako o bulehile phenyenye, pitla ea lejoe e le haufi le oona, ha a hloelisa ka tlung, a bona batho ba lona ba le ka har’a lekoaliba la mali, ba timetse.