Paramente e tima Qoo ho botsa potso ka thotobolo ea Ha Tsosane

serialong-qoo.jpg

Litho tsa bohanyetsi paramenteng ea Lesotho, li hlotsoe ho betsa ka majoe le ka likoto ka Labohlano lena, ka ha mosebetsi oa letsatsi e bile ho rapela feela, hoja Mokhethoa oa Malingoaneng a ne a tšepisitse sechaba sa Ha Tšosane karabo ea letona la puso ea libaka.

Monghali Serialong Qoo o re o ne a il’o botsa ka thotobolo e behileng bophelo ba sechaba sa Ha Ts’osane le mathoko a eona, tsietsing ka mosi o tsielitseng bahlokomeli ba eona, o foqohang nyene le bosiu, o bile o akha mollo o seng o senyelitse baahi ba bang, ’moho le ba motlakase.

O re potso ea hae le litšisinyo tse neng li lokela ho polanngoa ka Lekhotleng la Sechaba, li se li tla fumana sebaka bekeng e tlang. Ntle le moo, o re o se a file moetellipele oa DC lengolo le tsoang ho Malingoana, a llang ka ts’ebetso ea Morero oa Metsi a Lihlaba, o hanang ho ba fa matšeliso ka thepa ea bona e hapiloeng ke morero.

O re lengolo leo, le qhoaelletsoe litletlebo tsee ba li fileng ba ikarabelang morerong, tsee ba ntseng ba e-s’o fumane karabo ea tsona.O re Monghali Mathibeli Mokhothu o itse o tla fetisetsa litletlebo tseo, ho ba ka tsebang ho fana ka tharollo.