Mosali o otlanya thupa hore ha a lokollele monna thepa

Mosali oa Ntlholoetsane ka mor’a Lekhalo, Ha-Lechesa Matete, Mokhotlong, o re o otlanya thupa le lefatše hore a keke a nehelana ka thepa ea ntlo ea hae, ho monna ea reng o ne a e bolokile ha hae, joale o ilo e hlahla.

’Mapalesa Tsatsi o re sena se latela hore monna eo, a ee moreneng a re a fuoe tumello ea ho ea ha hae ho ea lata thepa ee a ileng a e supa ka tlung, empa ho se letho le bitsoang ka eena ka ho eona.

O re o belaela hore monna eo, o ntse a hlabiloe ke ha a sa kena litaba tsa morali oa hae le eena, ha a ne a re o batla ho mo nyala, ka ha a se a sa lule le mosali oa hae, empa ho se joalo.

Ho feta moo, o re o ne a utloele hore monna eo, o kile a qhekella morali oa hae ka ho mo neha likete tse hlano tsa Maloti, ngoanana a ithekela bethe, eo monna a ileng a e supa, har’a tsee a li supileng.

Monna ee ho lluoang ka eena, monghali Keresiane Mohai, o re thepa ee ho buuoang ka eona, ke ea matla a hae, o ne a mpa a e kopetse sebaka ha molli, hobane morali oa eo, a ne a e-na le likamano tsa bocheliete le eena, joale ha a se a e batla ke boriki.