Banna ba babeli, oa ’Melikane le oa Matebeng, Qachaseneke, ba bolaeloa mophatong ke litho tsa tšireletso

Banna ba babeli, oa ’Melikane le oa Matebeng Qachaseneke, ba tlalehoa ba ile ba thunngoa ke litho tsa sesole le tsa sepolesa, ho o mong oa mephato ea setereke seo, ka Labobeli la beke ena.

Mofuputsi oa litaba seterekeng seo sa habo Melele, Remaketse Busa, o re mong’a mophato o ’moleletse hore ho ile ha fihla litho tsa tšireletso tse seng li boletsoe, tse ileng tsa fafatsa banna bao ka lethala la likulo, ba ba ba ba timella sebakeng sa ketsahalo. 

O re ramophato o itse ka mor’a ketsahalo eo, litho tsa tšireletso li ile tsa laela ba neng ba le sebakeng seo ho phutha bafu, ho ba atametsa haufi le tsela, ba isoa polokelong ea litopo.

Banna bao,ba tlalehoa ba hlahella litlolong tsa molao tse ngata, tse kenyeletsang,lipolao tsa batho,lipeto le bosholu ba liphoofolo tikolohong ea ’Melikane.