Mohlalefi Phae o tseka bana ba Morena Sebonomoea sa bobeli

Lekhotla la maipiletso la Lesotho le tla liha kahlolo ka letsatsi la pele la khoeli e tlang, nyeoeng eo monghali Mohlalefi Phae a qosang Morena Sebonomoea Ramainoane, ka lintlha tse tharo tse latelang.

Phae o kopa lekhotla hore le phatlalatse mofumahali ’Makleinchere Ramainoane a sa ka a nyaloa, le amohe Morena Sebonomoea barali ba hae ba babeli, le be le mo fe tokelo ea ho beha majoe lebitleng, la mofumahali Makleinchere kapa ho hloma lejoe lebitleng leo.

Khang ea Phae e ne e lutse holim’a see akhente ea hae e neng e re ke lipehelo tsa moetlo oa Basotho tse fang batsoali ba mosali ho hlahla morali oa bona lenyalong, e leng taba e ileng ea makatsa baahloli haholo.

E mong oa bona o bile a botsa hore na moetlo oo o re motsoali a ka hlahla morali kamor’a lilemo tse robong lenyalong, haeba a se a fumanetse morali monna oa sekhorane, a ba a re na ho etsa joalo ha ho na ho fetola bana likhaupane na.

Khang ea Morena Sebonomoea ka ’muelli oa hae Adv.Zwelakhe Mda KC, ke hore Phae ha a na tokelo molaong ea ho ema kapel’a lekhotla ka litaba tseo, ka lebaka leo, lekhotla le hane ho mamela litaba tsa hae.

Ha a thetha litaba tsa hae morena Sebonomoea o itse ha a na thahasello ea ho abeloa litšenyehelo tsa nyeoe le ha a ka atleha, hobane o nka lelapa la Phae e le la bohoeng ba hae, ’me a rata hore bana ba hae ba hole ba le tseba e le la habo bona moholo.

Karabo eo e ile ea khotsofatsa baahloli ba bararo ba neng ba mametse nyeoe, ka le reng ke maikutlo a matle a ka thusang ho bopa likamano tse mofuthu lipakeng tsa ba ha Ramainoane le ba ha Phae.