Lekhotla le phahameng le laela mapolesa ho thusetsa phupung ea Hloohotšoeu Lechalaba

Motlatsi oa mongolisi lekhotleng le phahameng la Lesotho, o laetse mookameli oa sepolesa hore a romele mapolesa lapeng la Lechalaba, ho ea thusetsa ka tšireletso, hore litokisetso le phupu ea mofu Hloho-tšoeu Lechalaba, li tle li tsamae hantle.

Adv. R. Sehapi o bile o lemosa mookameli oa sepolesa sa Lesotho hore ho se ho le makhetlo lekhotla le laela hore mapolesa a thibele e mong Khopotso Lechalaba ho tlola litaelo tsa lona, empa, ha ho letho le kileng la etsahala.Compol o laetsoe ka thata hore a tiise ka hanong ho mapolesa, phethahatsong ea taelo ea joale.

Taba e sa hlakelang ba tsebang litaba tsena, ke hore na ’muelli oa lehlakore le llang eena o tholetseng ka tabahali ena, ea ho se ikobele litaelo tsa makhotla, ho etsoang ke eo Khopotso Lechalaba.

Ba re ha akhente e ne ka tlaleha boitšoaro bo boleloang ba Khopotso Lechalaba, e ka be e le khale a ne a romelloe chankaneng, tlas’a se bitsoang nyeliso ea taelo ea lekhotla.