Mosali o thunyetsoa senyethe sa Pitiki, Polloru, Leribe.

Mosali oa Maputsoe Ha Maqele, Leribe, o lokollotsoe ka Labobeli lena kamor’a ho kena sepetleleng sa tikoloho eo, a ne a thuntsoe phatleng ke litlokotsebe tse ileng tsa ikakhela ka har’a tente, Mpharane, Ha Pita Mokhitli, moo basali ba neng ba ntse ba etsa mosebetsi oa bona oa Pitiki, ka Sontaha se fetileng.

’Mataelo Tšephe, o re sena se latela hore ho fihle banna ba babeli, ba ileng ba kena ka jareteng ea hae ka e ’ngoe ea liheke, ba nto kena le tlas’a tente, moo ba ileng ba khabolisa sethunya, ba thunya e mong oa bona ea neng a ntse a bokeletsa chelete. 

O re banna bao, ba ile ba olla senyethe se neng se ilo aroleloa basali ba leshome le metso e robong, letsatsing le boletsoeng, empa thabo ea bona ea fetoha masoabi, ha mashotsoana ao a banna, a ikhapela bokhotho-khotho.

Leha ho le joalo, o re ha banna bao ba qeta ho ipha limenyane ka bokhothokhotho boo, basali ba bile le monyetla oa ho phutha bohashana bo ileng ba oela fatše nakong ee ho neng ho haharoa chelete ke linokoane ka lesela la tafole.