Mosali o re lekhotla le mo ahlotse le sa mo fa monyetla oa ho ikarabella, Mafeteng

Mosali oa Ha-Ramokoatsi,Mafeteng, oa mochonoko,o re lekhotla la Mathomo la Ramokoatsi le mo khahlotse makholo a robeli a Maloti, ka le reng o loantšitse banana ba bararo ba motse oo, ha ’m’ae a ahlotsoe makholo a tšeletseng hobane a ile a jela paate ntoeng eo, likhoeling tse peli tse fetileng. 

Nthabeleng Khotšeng o re kahlolo e liuoe a sa fuoa monyetla oa ho ikarabella hore banana bao, e mong oa bona o ne a ile a mo bitsetsa habo, moo e itseng ha a fihla, a ba fumaneng ba ntse ba e-noa joala ba lik’hotho, boo ba ileng ba mo qobella ho bo noa.

O re o ile a hana, ’me bao ba mo tsosetsa ntoa, ba mo bata ka tšepe, a fopha mali, a potlakela moreneng ho ea kopa thuso, empa letsoho la morena la mo qhalla matsoho, a lokela ho ea sepoleseng sa Mafeteng, se ileng sa mo fa foromo ea ngakeng, a sebeletsoa sepetlele Mafeteng.

Le ha ho le joalo, letsoho la morena oa Ha-Ramokoatsi, monghali Khomo-Peli Ramokoatsi, o re litaba tseo tsa molli li ile tsa ba tsa kena lekhotleng la Mathomo, moo banana bao, ’m’ae le eo molli, ba ileng ba ipolela ba le molato, ke ka hoo ba khahlotsoeng joalo.