Moporofeta o utsoetsa moruti

Moruti oa e ’ngoe ea likereke tsa pholoho, tse porofetang, e Naleli Lenkotong, Ha-’Mamatebele Raphuthing, o re moporofeta ee a neng a ntse a sebetsa le eena kerekeng eo, o utsoitse liphahlo tsa hae le tsa khaitselie, ka Moqebelo o fetileng.

Moruti Khechane Monyane, o re o ne a phuthile moporofeta eo hobane ho ne ho se moo a lulang, ’me o ne a sebetsa hantle bosebeletsing ba Boporofeta, empa o mo qhalile ka bosholu. 

Leha ho le joalo, Lehakoe la Litaba le hlotsoe ho fumana moporofeta ea boleloang, hobane mohala oa hae o sa fumanehe, empa o ntse a buletsoe ho fana ka lehlakore la hae.