Mok’hanselara o bolaoa ke batho ba sa tsejoeng Mohalesuku

Morena oa Qalakheng 2, Ha-Pebane, Mohalesuku, o re mok’hanselara oa tikoloho eo e leng mosali, o bolailoe ke batho ba sa tsejoeng shoalaneng ea Labobeli lena.

Morena Thabiso Pebane, o re o ile a letsetsoa ka le reng a potlakele ha mok’hanselara tsietsi e hlahile,’me eena a tsebisa mahokela a hae, a ileng a fihla sebakeng sa ketsahalo. 

O re mofu o fumanoe a fasitsoe maoto le matsoho, a le ka har’a letamo la mali, ’me tlhaloso ee a e filoeng, ke hore ho ne ho ile ha fihla mosali ea neng a ikhakantse sa mokana a il’o reka mahe, empa a sa le moo, a re o sa il’o bitsa monna oa hae mok’hanselara a tlo ba kopanya, kaha ba qabane, athe o bitsa linokoane.

O re hoba linokoane li kene, li ile tsa batla chelete ho mong’a lelapa, tsa mo hlaba ka lintho tse bohale le ho mo fasa maoto le matsoho. Ho feta moo li le tsa tlama setloholo sa mofu se lilemo li ka bang leshome le metso e mene matsoho, tsa se laela ho ea se bontša moo chelete e lulang, tsa fumana makholo a supileng a Maloti, empa tsa e halala, ka mor’a moo tsa baleha.