MoAfrika e khoants’olla monna ka chelete e il’o lefella mots’oaruoa

Mosali oa Khubetsoana, Ha ’Makarabo, Mafeteng, o re mohiri oa molekane oa hae, ea neng a mo sokolisa ka chelete ee a neng a itse o il’o mo tlatsa ka ea hae hore a tsebe ho lefella monna oa hae toronkong, o rometse motho ea e isitseng ho eena, ka Laboraro lena.

’Matšepang Phantši o re o mo romella kamor’a ho hloella Qhoeoeng ena, hobane a ne a sa fumana thuso mapoleseng a setereke seo, ’me o leboha Moafrika ka tsela e khethehileng.

O re Maloti a makholo a supileng, a ne a il’o tlatsoa ka a robeli, kaha monna eo a ne a itlamme hore o tla mo lefella hobane a ile a ahloloa likete tse tharo tsa Maloti kapa lilemo tse tharo, ’me halofo ea tsona ea fanyehoa.

Monna oa hae a fumanoe a le molato oa bosholu ba likobo Matholeng hona Mafeteng.Leha ho le joalo, Lehakoe la Litaba le ne le ile la hloloa ho fumana ee ho lluoang ka eena, hobane mohala oa hae o ne o sa fumanehe.