Banna ba timela kamor’a ho hlajoa ka lintho tse bohale, Maseru

IMG_3470_12e7daca-adbc-4991-b98b-2b9df34f3569_900x

Morena oa Boinyatso Ha-Pasane, Maseru, o re banna ba babeli ba metse e busoang ke eena, ba ile ba timela ka mor’a ho hlajoa ka lintho tse bohale metseng e fapakaneng, mafelong a beke e fetileng.

Morena Masekoane Pasane o re oa pele, oa Ha-Makuili, o ile a hlaseloa a le tlung ea mothamahane, a e-na le ba motse oa habo, ba neng ba ile Ha-Makhalanyane, ho ea hloma litente lapeng le leng, ka Labohlano.

O re eo o ile a tsoela kantle ho ea fahla mokholutsoane, empa a khutla a se a rotha mali, eare ha a leka ho ba hlalosetsa se etsahetseng, ba habo ba tsoa, ke moo ba fumaneng bahlankana ba Ha-Makhalanyane, eaba bona ba qela ho leoto, empa bao ba ba manakisa.

Morena Pasane o re boemong boo, ba Ha-Makhalanyane ba ile ba fethetsa ba Ha-Makuili ka majoe, ba bata e mong, a oa, ba fihla ba mo nyekenya ka lintho tse bohale, ba nto mo siea moo, a fumanoa a timetse ka Moqebelo oa beke eo.

Ho sa le joalo, o re monna e mong oa Ha-Pasane Maseru, o ile a timela ka mor’a ho hlajoa ka lintho tse bohale a le motseng oa Ha-Sikeme, moo ho neng ho memetsoe bahlankana ba Ha-Pasane Hlopheng ka Moqebelo o fetileng.

Morena Pasane o re hona hlopheng moo, bahlankana ba Ha-Makuili ba ile ba tsosa moferefere, oo itseng ha mong’a lelapa a ba thiba, ba hana ho laoleha, ha a tla thusoa ke mohlankana oa Ha-Pasane, ee bao ba ileng ba mo hlaba ka tse boletsoeng, a hlokahalla sebakeng seo.

A bua Nyakafataneng ea Laboraro lena, moholoane oa mofu monghali Kaizer Thakholi o re o tlalehile litaba tsena sepoleseng sa Roma se bileng sa ea sebakeng sa ketsahalo ho ea phutha setopo.

O re babelaelloa bona o bolelletsoe hore ba ile ba khutlisoa sepoleseng hoja ba ne ba isitsoe ke ntat’a bona ka lereng ba isoe ngakeng le hoja eena a bone ba sa lemala, empa ha morao a letsetsoa a bolelloa hore baa lokolloa kaha bopaki ha bo tšoarehe hobane babelaelloa ba ea hana.

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.