Lihoai li rekisa liphoofolo ka lebaka la ho se lefshoe boea ba likhuts’oane tsa bona

Moahi oa Manamela Ha-Talimo, Botha-Bothe, o re o se a bile a ntse a rekisa linku tsa hae tsa boea, molemong oa ho ntšetsa bophelo pele, hobane o ntse a e-so fumane chelete ea boea. 

’Mamabusetsa Kose, o re o bua sena hobane e se e le makhetlo a leshome a e-ea bankeng ka sepheo sa ho fumana chelete, e mpa o khutla kamehla likola li le ka mahlong. 

O re o hloloa ho lefa balisana, ho rekela linku meriana le ho lefella lithuto tsa bana sekolong,’me ha a sa na letsoho la bobeli, hobane molekane oa hae ha a sa sebetsa, ba ne ba se ba itšetlehile ka chelete eo..

Ho sa le joalo, monghali Mara Mosae oa Mphaki, Ha-’Mamatlole Letsie, Quthing, o re o rekisitse likhomo tsa hae, hobane a sa fumana chelete ea boea ba likhutšoane ba ngoahola, ka mabaka ana o seleballetsoe.

O re o ne a e-na le likhomo tse leshome, o rekisitse tse robeli, molemong oa hore tse peli tse setseng, a ’ne a ee masimong ka tsona, joale o se a kene thekisong ea leruo la linku ho ntšetsapele bophelo.