Monna o re toka e phethoe, Koung Ha Chere

Monna oa Makhalaneng Koung Ha-Chere, Maseru, o re o hloka hore molao o sebetse ka toka molemong oa hore k’hansele ea habo ea Likolobeng A03 e mo sebeletse ka nepo, tabeng ea setša see a se abetsoeng ke lelapa, see a boleletsoeng hore o ikekelelitse sona.

Monghali Majoro Majoro, o re sena se latela hore k’hansele e etele setša seo ka makhetlo a ’maloa, e bua litaba tse sa tšoaneng holim’a semetho see e reng o ikekelelitse mobu, oo le oona a sa tsebeng tse ka hare ho form C ea sona hobane k’hansele e hana ka tokomane eo.

O re ho feta moo, o utloetse hore setša seo, se se se e-na le litokomane tse peli tsa Form C ea hae le motho e mong, le ha ho le joalo, o ntse a eme mantsoeng a hae hore toka e phethoe, a se ke a lulisoa lejoe le motsu, a fuoe litokomane tse nepahetseng. 

Leha ho le joalo mok’hanselara ’Mankanano Sojane, o re o hlokomelisitse molli hore ho ikekeletsa setša hoo, o koetse tsela ea sechaba, joale a eme moo setša seo se lokelang, ho latela tokomane.

Ho feta moo, tabeng ea liform C tse boleloang tse peli, eena o tseba e ’ngoe e le ea setša sa lelapa le leng e seng sa monghali Majoro, ka baka eo, k’hansele e tla sebetsa ka matla ho rarolla qaka e lipakeng tsa eona le molli molemong oa khotso.