Majoro oa Maseru o hlotse letona ka nyeoe Lekhotleng le Phahameng

Webp.net-resizeimage-11

Mpho Moloi, majoro oa toropo ea Maseru, o lahlile letona la puso ea libaka le borena ka nyeoe moo a neng a tseka hore eena le ba bang ba bahlano ba lelekiloe mosebetsing oa bona hampe ke motho ea se nang le boemo ba ho ba leleka.

Kahlolo ea Molefi Makara J. ea Labobeli la beke ena, e ahloletse benghali Mpho Moloi,Tholang Sefojane, Lebohang Ramathe, Nthabeleng Ntšasa, Tlali Lebesa le Thabo Hlehlisi khahlanong le letona le ikarabeleng le ba bang ba leshome le metso e supileng ba neng ba khema le lona e le baikarabelli.

Kahlolo e re bao ba tš’eletseng, ba buseletsoe tsohle tsa bona tsee ba neng ba se ba li amohiloe ka lebaka la teleko e neng e se molaong. Kaofela ha bona, ba hlalosoa e ne e le litho tsa Boto ea Kabo ea Mesebetsi ea ’Masepala oa Maseru.

Akhente ea bona, Adv Letuka Molati, e re pelaelo ea bona e ne e bile e re teleko ea bona e ne e le matsollopeli mapata masene, hona le moo moleleki oa bona a neng a habile teng, etsoe ho ea ka bona, e le mopolotiki joalo ka bona.

O re le hoja bao ba tšeletseng ba thabetse kahlolo, ba re e khutlile tseleng, ha e a ba namolela ka ho phethahala, hobane ha ea re letho ka kopo ea bona e reng lekhotla le phatlalatse litemana tsa molao, tse fang letona matla a ho ba leleka, li thulana le molao oa tsamaiso e ntle ea puso, o tjebeloe matjoing.