Nkhono Nthatisi Lechalaba o hlola nyeoe ea setopo

Nkhono Nthatisi Lechalaba oa Motimposo Ha-Majara Theko, Maseru, o re o leboha Moafrika FM, e ileng ea tsamaea le eena leeto la nako e telele ka litaba tsa litsekisano tsa mafa a ha Lechalaba, empa kaholimo ho tsohle, tsa ho bolokoa ha setopo se seng se le likhoeli tse tšeletseng se le ’moshareng.

Nkhono Nthatisi o re o bua sena, a ipapisitse le kahlolo ea Lekhotla le Phahameng, ea Lapele la beke ena, le itseng a ka boloka setloholo sa hae, Hlooho-tšoeu Lechalaba, se neng se hlokahale khoeling ea boraro ea selemo sena, empa a setisoa ho se boloka ke nyeoe ea Makhala Lechalaba le mora oa hae Khopotso Mathabeng Lechalaba.

Nyeoe e bileng kapel’a Molefi Makara J e ne e re setopo se lokela ho bolokoa ke lelapa Matube, le ileng la hanana le bona ka khotla, la ema le Nthatisi.

O re le hoja nyeoe e ile ea roropa nako e telele, e bile e hlaha nakong ee a neng a le kamor’a sehlahla, Moafrika e ile ea ema le eena, ho mo fileng matla a ’mele le kelello. Ka hona, o re o tla nolofalloa ke ho boloka mofu eo oa hae.

Litaba tsa bahlolohali ba mofu Sello Paul Lechalaba, li ne li fihle qhooeng ena ka mongoaha oa 2016, li tlisoa ke eena Hlooho-tšoeu. O ne a buelloa ke Adv. Chris Lephuthing.