Masole a Lesotho Maputsoe

Banna ba bane ho ba bahlano, ba ile ba paqamisoa fatše ke litho tsa Sesole sa Lesotho, ka mor’a hore li ba fumane ba emisitse koloi ka thoko ho tsela, ’Maletlapana Ha-Nyenye, Leribe ba phehile khang e malebana le motho ea lokelang ho ba qhobela eona, kaha ba ne ba bo khile ka likhopo, ka Labosupa la beke e fetileng.

Mofuputsi oa litaba tikolohong ea Maputsoe monghali Sepeka Makoae, o re tlaleho ee a e fumaneng e re banna ba ne ba ile ba tsoa ka koloing eo ba batla hore e mong ea sa imeloang ke khera a ba khannele eona, athe masole a tla fihla ba ntse ba bua ka taba eo. 

O re masole a ile a laela bao ho paqama, empa oa bohlano ho bona, a etsa sa-mokana eka o ea fatše, athe o tla menola tlhabela, empa ha a le sebakana, a hetla, a bona ho cha sepolo, le hoja a sa ka a tseba phelello ea bona.

Ho sa le joalo, monna le mosali ba neng ba robile monakeli ka koloing ea lephele, shoalaneng ea Lapele lena, Moselinyane Ha-Nyenye, Leribe, ba ile ba paqamisoa fatše ke masole a ileng a ba fumana ka har’a eona.

Monghali Sepeka, o re koloi eo, e tlalehoa e ne e emisitsoe haufi le jarete ea e mong oa baahi ba motse oo, ea itseng esale e ema moo, ho fihlela masole a ba ntša ka ho eona, a ba bolaisa lebetlela, bona ba kopa tšoarelo, e ileng ea lateloa ke mantsoe a hore ba se hlole ba bonoa moo.