Bakuli ba lla ka ho se fumane lipilisi,litsing tsa bophelo

Monna oa Ha-Tikoe, Maseru, o re ke bothata hore a fumane lipilisi tsa bophelo bohle setsing sa bophelo se tikolohong ea habo, hobane a boleletsoe hore lethathamo le amoheloang ke la mashome a mararo a metso e mehlano feela.

Ea itšebileng le Lehakoe la Litaba, o re o ne a ile a ea setsing seo, ha khoeli ea Loetse e ne e hlola matsatsi a mashome a mabeli a metso e mehlano, ho ea lata lipilisi, empa a ’na a tlolisoa khati le ba bang hore ha feela ba le ka ba kaholimo ho lenane le boletsoeng ba keke ba thusoa.

Leha ho le joalo, momameli o tla hopola hore bekeng e fetileng, phala ea sepetlele sa Queen ’Mamohato Memorial, e ile ea bua qhooeng ena hore ’muso oa Lesotho o fokolitse lenane la kamohelo ea bakuli litsing tsa bophelo tse oelang tlaša sepetlele.