Mok’hanselara oa Thab’a-moea o re o hloletsoe ke tsela ee bacha le bana ba sekolo se bohareng sa Popa, Mantšonyane Ha-Popa Mahao, Thaba-Tseka, ba bonahalang ba e-na le tjantjello ea ho itokisetsa tsela sebakeng seo.

’M’e ’Mapabala Mathaba o re mosebetsi ona, bacha ba o qalile ka Boipuso ba selemo sena,’me le joale ba ntse ba tsoela-pele ho intlafaletsa ho se mang kapa mang ea ba khannang ka morao.

Mekhatlo e meraro ea basebetsi ba lifeme e hana ho buisana le ’muso ka le reng khale e qekisa ’muso ka chelete e bitsoang “seoa-holimo” hore basebetsi ba hloka chelete ea bona ka hoo ‘muso o tle tafoleng ea lipuisano.

Mekhatlo ena e leng UNITE, Lentsoe La Sechaba le NACTWU, e re e ile ea ngolla mokhatlo o moholo oa machaba oa Bosebetsi ILO, ho o kopa ho otla muso oa Lesotho ’mopong kaha o ithiba litsebe.

Ho sa le joalo mokhatlo oo oa machaba o arabile mekhatlo ena o se o bile o fane ka mokena-lipakeng ho tla sebetsana le tseko eo ea seoa-holimo e leng lona lebaka leo o reng ‘muso ke hona o bonahalang eka o na le thahasello joale eona ha e sa buiseha ka le reng “It’s too late”. Athe IDUL eona e re e se e nkile ’muso ka lechoba ho ea khotla.

Ho sa le joalo, LNDC e tšepisitse mokhatlo oa NACTWU hore e tla leka ho kopana le koporasi ea motlakase (LEC), hore e mpe e be pelo e mongobo, moo e seng e menetse phatla, feme e timetsoeng motlakase ke ho imela ke sekoloto ka seteisheneng Maseru, kaha ketso eo e behile mesebetsi ea basebetsi ba baloang ka makholo tlokotsing.

NACTWU ka molomo oa motlatsi oa mongoli e moholo oa mokhatlo, Tšepang Makakole, e re LNDC e joetsitse bookameli ba feme hore bo se ke ba tla ba omelelitse melomo, bo le matsoho, empa bo tle ka se tla khothatsa LEC hore e buisehe.Ho feta moo ea re e tla tsebisa mokhatlo ka letsatsi la pele la beke e tla thoasa, hore na e hakae le hore na tema e teng.

K’hamphani ea mehala ea Econet Telecom Lesotho, e abetse baithuti ba leshome le metso e mene ba likolo tse kholo tsa naha ena, likhau tsa boipabolo lithutong tsa bona, ka Labohlano lena.

’Mathabo Masoabi, o re baithuti bao, ba ipabotse lithutong tsa marang-rang, tsamaiso ea khoebo le Lipalo-palo, ka baka leo, ba filoe chelete le mangolo.Bona ke ba tsoang sekolong se seholo sa Sechaba, Limkokwing le Lerotholi Polytechnic.

Lekhotla la maipiletso la Lesotho le tla liha kahlolo ka letsatsi la pele la khoeli e tlang, nyeoeng eo monghali Mohlalefi Phae a qosang Morena Sebonomoea Ramainoane, ka lintlha tse tharo tse latelang.

Phae o kopa lekhotla hore le phatlalatse mofumahali ’Makleinchere Ramainoane a sa ka a nyaloa, le amohe Morena Sebonomoea barali ba hae ba babeli, le be le mo fe tokelo ea ho beha majoe lebitleng, la mofumahali Makleinchere kapa ho hloma lejoe lebitleng leo.

Khang ea Phae e ne e lutse holim’a see akhente ea hae e neng e re ke lipehelo tsa moetlo oa Basotho tse fang batsoali ba mosali ho hlahla morali oa bona lenyalong, e leng taba e ileng ea makatsa baahloli haholo.

E mong oa bona o bile a botsa hore na moetlo oo o re motsoali a ka hlahla morali kamor’a lilemo tse robong lenyalong, haeba a se a fumanetse morali monna oa sekhorane, a ba a re na ho etsa joalo ha ho na ho fetola bana likhaupane na.

Khang ea Morena Sebonomoea ka ’muelli oa hae Adv.Zwelakhe Mda KC, ke hore Phae ha a na tokelo molaong ea ho ema kapel’a lekhotla ka litaba tseo, ka lebaka leo, lekhotla le hane ho mamela litaba tsa hae.

Ha a thetha litaba tsa hae morena Sebonomoea o itse ha a na thahasello ea ho abeloa litšenyehelo tsa nyeoe le ha a ka atleha, hobane o nka lelapa la Phae e le la bohoeng ba hae, ’me a rata hore bana ba hae ba hole ba le tseba e le la habo bona moholo.

Karabo eo e ile ea khotsofatsa baahloli ba bararo ba neng ba mametse nyeoe, ka le reng ke maikutlo a matle a ka thusang ho bopa likamano tse mofuthu lipakeng tsa ba ha Ramainoane le ba ha Phae.

Puo ea Sesotho ka Labone lena, e butse Basotho likelello malebana le litaba tsa bohlokoa, tsee e sa leng li fetoa mohoalotso ke barupelli le baetellipele ba bona ka lilemo tse telele-telele, empa litaba tseo, li bile li ngotsoe litokomaneng tsa bohlokoa tsa naha ena.

Bataung ba itse ba ne ba utloa lekhetlo la pele, ka lenaneo leo hore Mohlomi mor’a Monyane o shoele a ba kolota thupelo ea bo-roka-pula, ee morena oa bona Mophethe a neng a ile a e lefella ka likhomo tse supileng, Moletsane e le eena ea neng a lokela ho rupelloa, athe ka nako ea tefo, o ne a le monyenyane haholo lilemong, Mohlomi a timela pele mohlankana a fihlela lilemo tse hlokahalang, tsa kholo.

Ntlha ea bobeli e bile holim’a Chebelopele ea Sechaba sa Basotho ea selemo sa 2020 e neng e ts’episitse sechaba sa naha ena hore ha selemo seo se fihla, Lesotho e tla be e le naha ea khotso le nala, e hatetsepele mafapheng a ntlafatso ea litsebo le tsohle tse hlokoang ke Mosotho oa joale.

Lenaneo le ile la sibolla hore se etsahetseng ka lilemo tse ngata-ngata, ho tloha phatlalatsong ea buka ea Chebelopele ka selemo sa 2004, ho tla kena joale, e bile ho jesa Basotho hlooho ea ts’oene e furalalitsoe, babusi ba ntse ba re ke ea nku.

Leqephe le ileng la khaola khang ke la mashome a ts’eletseng a metso e ’meli le supang hore na ts’ebetso e ne e lokela ho tsamaea joang. Le itse mosebetsi oo, o ne behiloe boikarabelong ba lihlopha tse tharo, e leng Komiti ea Paramente ea Meralo, Boto ea Naha ea Meralo le Sehlopha sa Litsebi tse Ikemetseng.

Ka thuso ea lenaneo, sechaba se tsebile hore ha ho mohla libopeho tseo li kileng tsa thehoa, ka lebaka leo, ha ho ka moo, mosebetsi o neng o ka etsoa ka teng.

Moahi oa Borokhoaneng Ha-Tšeliso Mabusa, Maseru, o re mora oa hae ee e leng lehokela motseng oo, o ile a hlokahalla sepetlele Queen ’Mamohato Memorial khoeling e fetileng, ka mor’a ho khakhathoa ke mahokela a habo. 

Monghali Tefo Mokorosi o re sena se latela hore mahokela a motse oo, a bitsetse mora oa hae le bahlankana ba bang ba bane, ka lelaeneng la hae, moo ba ileng ba tokhotsoa ke oona, a nto ba isa sepetlele, ka taelo ea sepolesa sa Ha-Thamae, moo mor’a hae a timeletseng teng hamorao. 

O re ketsahalong eo, ho timetse batho ba babeli ho balelloa le mora oa hae,’me ho fihlela lena, o ntse a e-s’o tsebisoe sesosa sa taba ena e lebisitseng ho shoeng ha bao.Monghali Mokorosi, o re mora o tla bolokoa ka Sontaha sena, le hoja ho se motho ea tšoaretsoeng tlolo eo ea molao.

Bahiri ho a mang a malaene a Mantšoanyane Ha-Chooko Thaba-Tseka, ba re ba patlong ea mosali oa Ha-Motau seterekeng seo, ea siileng bana ba bararo ba le bang, ka Labone le fetileng.

Mofani oa litaba tsena ee Lehakoe la Litaba le buisaneng le eena, o re mabitso a mosali eo ke Alice Ramoshabe kapa ’Mamothobi Ntsamai, ee ho utloahalang a ile Maputsoe moo a tšepisitsoeng mosebetsi oa ho ea tlama thita-poho. ‘me ‘m’a ea ngoana ea lilemo li peli, ke Nthoesele Ntsamai.

Leha ho le joalo, baahi ba se ba kopa ba habo mosali ea boleloang ho ea lata bana, ka ha ba se ba itšetlehile ka thuso ea baahisane.

Moahi oa Selomong Ha Khohlopo, Thaba-Tseka, o re o chelletsoe ke matlo a mabeli ka mohlolo, ea rontabole le ea mokhoro, le thepa eohle, e akhang lijo le liaparo har’a tse ling, hoseng ha Laboraro lena.

Monghali Thabo Ratalane, o re tsena li etsahetse mosalia le sieo le eena a le patlong ea liphoofolo tse khaphohileng ho tse ling motebong tsee le tsona a sa li fumanang.

O re e mong oa bana o ile a bona lelakabe le nyoloha fatše ka tlung, nakong ee a neng a il’o lata liaparo tsa sekolo, kaha ba ne ba robetse ha moahisane,’me a le baleha le ho hlaba mokhosi, sechaba sa phalla, empa mollo oa se hlola, hoo lelakabe le ileng la nanabela ntlo e ’ngoe ea mokhoro, ee le eona e qetelletseng e chele lore.

Phala ea kereke ea Moshoeshoe, e re ho tla ba le tšebetso ea ho cheka-bocha seliba se neng se sebelisoa ke moporofeta Walter Matita, e tlang ho etellapele tšebeletso ea Kopano le Thatano ea Balumeli e tla ba ka Moqebelo oa beke e tlang.

Moruti Thabo Nthako, o re tšebetso eo ea tlhoekiso ea seliba, e tla ba ka Moqebelo oa beke ena holim’a thaba ea Molimo Tsereoane, e Berea, lihoreng tsa motšehare.

O re ho feta moo, tšebeletso e tla ba bekeng e tlang ka Moqebelo, e tla tšoareloa holong ea nkhono ’Maoetsi e Teyateyaneng Ha-Ratšiu, Berea, ’me e tla ba ea bosiu bohle, bohle ba lebeletsoe.

Mookameli oa sepolesa sa Lesotho o hlahletse maipiletso a kopang hore lekhotla leo, le tjebele matjoing kahlolo ea lekhotla le phahameng, ea hore a lefe litho tsa sona tse mashome a mararo a metso e supileng, ho latela liphahamiso tsa tsona.

Lekhotla le ile la makala ha ’muelli oa baikarabelli, a le bolella hore le hoja mookameli a ipilelitse, ha a e-so lefe litho tseo. A re ho oa makatsa hobane ha ho moo sepolesa se ileng sa hlahlela nyeoe e qholotsang liphahamiso tseo makhotleng a boahloli, kaha se bile se e-so amohe litho tseo maemo.

Lekhotla le ne le bopiloe ka baahloli, Petrus Damaseb, Moses Hungwe Chinhengo le Johan Van Der West-huizen ba tlang ho liha kahlolo ka letsatsi la pele la khoeli e tlang.