Phokotso ea lenane la bakuli le hlolisa ngoana ho bona lingaka Ha Mabote

Monna oa Ha-Mabote, Berea, o re ile a lokela ho isa morali oa hae ngakeng e ’ngoe ka mor’a hore a hloloe ho mo isa setsing sa bophelo se tikolohong eo, ka makhetlo a mabeli a ntse a bolelloa hore lenane la bakuli le lokelang ho thusoa le se le koetsoe, ka Labohlano le fetileng le ka Lapele la beke ena.

Monghali Lebohang Makiba, o re o ne a ile a isa ngoana ngakeng ka Labobeli le fetileng, a lla ka bohloko ba tsebe,’me ngaka ea mo alafa, eaba ea re a khutle ka Labohlano la eona, empa a hloloa ka baka la lenane leo.

O re o ile a bolelloa hore a tle a mo khutlisetse ka Lapele la beke ena, empa le ha a ne a lumela hore o tsohelletse, ho qoba ho koalloa kantle, kaha a ne a ile teng pele ho hora ea bohlano hoseng, o ile a ’na a hloloa.

O re o fumane hore setsi nka lenane la bakuli ba mashome a mararo feela ka letsatsi, e seng ho feta moo,’me ba ka fihlang le se le koetsoe, ba se ba keke ba fumana litšebeletso.

Leha ho le joalo, phala sepetleleng sa Queen ’Mamohato Memorial, Mothepane Thahane,e boleletse Lehakoe la litaba hore ’muso oa Lesotho o laetse hore litsi tsohle tsa bophelo, tse oelang tlas’a sepetlele, li amohele lenane le itseng feela,kaha ha o na chelete ea ho li lefa.