Ramatla o qosoa ka mmomori oa ho fenetha litho tsa MEC

Thabo Ramatla oa Lecoop, Mafeteng, o hlahile ka pel’a lekhotla la ’maseterata,seterekeng seo ka Labobeli lena, a qosoa ka ho ba le ’mommori oa ho fenetha litho tsa lekhotla la MEC.

Ramatla ea lilemo li mashome a mane a motso o mong, ee e leng Moparamente oa lekhotla la Sethala sa kholiso ea moruo, MEC, o tobane le qoso ea ho rera lefu la benghali:Selibe Mochoboroane le Jimmy Ramakoalibane ka Phuptjane ea monongoaha.

Khang ea babuelli ba moqosuoa ke hore taba ena ke moritaoke, empa e le ho silafatsa seriti sa moqusuoa ke ba qothisanang lehlokoa le eena lipolotiking, ka ho sebelisa litsi tsa puso hampe.

Moqosuoa o theohetse ka banneng,’me o tla hlaha ha khutšoanyane ka la borobeli la khoeli e tlang.’Maseterata nyeoeng ena ke Ramabele.

Hona lekhotleng leo, ho bile ha hlahella taba e reng akhente ea Thabo Ramatla e tlil’o khakhathoa hang ha e tsoa ka lekhotleng leo, ’me taba eo e se e tlalehetsoe sepolesa sa Mafeteng.