Letsatsi la la mashome a mabeli a metso e ’meli Loetse ha se la ho lebaloa.

Ka letsatsi la la mashome a mabeli a metso e ’meli, Loetse, ka selemo sa 1998, e le Labobeli bekeng, sesole sa Afrika Boroa, South African National Defence Force (Sandf), se neng se rehelletsoe ka sa Sadc, se ne se hlasele sa Lesotho Makoanyane le Letamong la Katse, ha shoa masole a mangata a Lesotho, haholo-holo Katse, e le a neng a lebetse letamo.

A mang a masole ao a Lesotho, litlalehong tse neng li netefatsoe ka lits’oants’o, a ne a tlalehoe a bolailoe a robetse, ha a mang a ne a le tseleng, a ikoetlisa ka ho matha.

Sandf e ne e tlile ka memo ea ’Muso oa Lesotho ho tla qhala bonyatsi bo neng bo shatela ’muso, bo eme khorong ea botlotlehi Maseru, bo se bo bile bo le makhatheng a ho lahla ’muso fats’e ka liqhana, ka ha bo ne bo e-na le ts’ehetso e matla ea litho tse ling tsa sesole le tsa sepolesa, tse neng li se li sa okhe matla bolaoling ba molao ba naha.

Polotiking ea nako eo, ’Muso o ne o etelletsoe-pele ke tonakholo Pakalitha Mosisili, ea neng a ts’ehelitsoe ka matla ke letona la hae la machabeng, monghali Motsoahe Thabane, tonakholo ea joale e seng e sa okhelane mollo le mong’a eona oa nakong eo e thata.

Ka lehlakoreng la bohanyetsi, ba neng ba le ka pele-pele, benghali Molapo Qhobela ka BCP, Rets’elitsitsoe Sekhonyana ka BNP le Moeketse Malebo ka MFP, ba ne ba reneketsoe ka lebitso la Setlamo sa Bohanyetsi. Ho ne ho busa LCD e petepete.

Sesole se ne se laoloa ke Maj Gen Makhula Mosakeng ea neng a phahamisetsoe boemong ba Lt Gen kamor’a ho busetsoa litulong a se a tsoa latoa mabotsela.

Hona le litlaleho tse reng hang ho ba Sandf e qhale bohanyetsi khorong ea botlotlehi, ’me e kene kahar’a jarete, e ne e hlome folakha ea Afrika Boroa, ea liha ea Lesotho.