Monna o re lepolesa le mo senyelitse nako ka ho mo ts’oarela taba ee a sa e ahloleloang

Monna oa Nazaretha Machache, Ha Mosuoe, Maseru, o re lepolesa la Sefikeng, Berea, le mo qetisitse matsatsi kamor’a ho mo tšoara ka Laboraro la beke ena, ka le reng ha a na tokelo ea ho rekisa boea ba linku tsa hae.

Malefane Ralesupi o re o ne a ile a kuta linku, a tlatsa mekotla e leshome le metso e robong, eare ha a le tseleng e tsoang Sekiring, a kopana le lepolesa le ileng la re a le fe bopaki ba hore boea ke ba linku tsa hae, a hlahisa tlakana-tšooana e pakang seo, la re ke ea khale, eaba le mo batla sekete sa Maloti.

O re itse ha a re ha a na sona, la re a le fe mokotla o le mong oa boea, a hana, la mo batla babeisi a sa kang a fumaneha, kaha moo a neng a lokela ho a nka teng, a le sieo, ke moo le ileng la mo tšoara la ea mo koalla mapoleseng a Sefikeng.

Ralesupi o re ka Labohlano lena, nyeoe e ne e il’o buuoa, lekhotleng la ’Maseterata, Berea, empa ka mabaka ao a sa a tsebeng, ha e ea ka ea tsoelapele kaha o ile a khutlisoa tseleng ho sa thoe letho ho eena.