Mohoebi oa Maseru o re MoPakisetane o mo khannela tšollong ea mali

Lelapa la khoebo la Maseru le lla ka tlhokahalo ea toka makhotleng a Lesotho, hoo lona le ea tsekisanang le lona, ba seng ba tjamelane ka tsela e ka ’nang ea tšolla mali a se nang molato ka mahlakoreng a mabeli.

Mrs ’Maposholi Mosothoane, a bua lebitsoang la khoebo ea lelapa la hae, o bolelletse Lehakoe la Litaba la Moafrika hore o tseka setša sa khoebo le mohoebi oa molata, ea mo sebelisang ka likhoka tse mo tlamang hore a etse “khomo e-s’o mphe matla le ’na ke tla u fa matla”.

O bontšitse Lehakoe la Litaba patantahali ea litokomane tsa lekhotla tsee a reng ke tsa linyeoe tsa hae le bahoebi bao ba mofuta oa MaPakistane, ba ntseng ba tsoelapele ho ntlafatsa setša seo se tsekoang.

Lehakoe la Litaba le hlotsoe ho fumana ’Maseterata Molapo, ee Mrs Mosothoane a reng ke eena ea ntseng a mamela taba ena. Moafrika e ne e mpa e batla ho bona kapa ho utloa hore na lekhotla le arohane le batsekisani le reng eng.

Boeletsi ba molao boo MOAFRIKA e nang le bona, bo re moo ho nang le khang ea mofuta ona, lekhotla le ee le fane ka taelo e reng ho se be ea kena-kenanang le se tsekoang ho fihlela nyeoe e felile, e le hore ea ka itsoellangpele, a tle a khalengoe ka kotlo ea lekhotla tlas’a se bitsoang “nyeliso ea lekhotla”.

’Muelli oa Mrs Mosothoane, Adv Thebe Peete o re ba ile ba ea kopa taelo ea nakoana lekhotleng, empa ba thulana le liakhente tsa lehlakore le leng;’maseterata a ba laela ho tla khotla ka la leshome le metso e supileng la Mphalane,ho ea ngangisana holim’a hore na ho thibeloe mang ho lumelloe mang ka mobu oo.

Mrs Mosothoane o re khang ea hae ke hore boemong bona boo ba ntseng ba emetse ho ea khotla,Mo-Pakistane o ntse a tsoelapele ho sebetsa mobu oo, e leng see a ke keng a se emela, esere a aha serobe phiri e se e jele.