Masole a khalemella monna ho tsubela kahar’a basali, Maputsoe

Monna oa Maputsoe Ha-Nyenye, Leribe, o ile a jesoa matekoane ao a neng a ntse a a tsubela haufi le basali ba neng ba fotse ho e ’ngoe ea lifeme tsa tikoloho eo, ka Labone la beke ena.

Mofuputsi oa litaba Maputsoe, monghali Sepeka Makoae, o re masole a ne a ile a fihla sebakeng seo, a fumana monna a ntse a tsuba matekoane, eaba a mo botsa mabaka a etsang hore a tsubele botenng ba batho.

O re monna o ile a hloloa ho araba, eaba moo masole a mo laelang ho itjella matekoane ao a mang a oona a neng a le ka pokothong, ho kenyeletsa le ao a neng a ntse a a tsuba, ’me a phethahatsa seo.

Le ha ho le joalo, monghali Sepeka, o re ka mor’a hore masole a tsamae, monna o ile a tšosa e mong oa basali ba neng ba le moo ka lefu, ’me ba utloileng polelo eo, ba mo joetsa hore ha eo a ka hlaheloa ke kotsi, ba tla ikopanye le eena.