Baahi ba fapana ka maikutlo ho hlomeng motebo-ntloana ha masole, Maputsoe

Baahi ba Maputsoe Ha-Nyenye, Leribe, ba ile ba fapakana ka maikutlo ka boteng ba masole a fihlileng tikolohong eo ka Moqebelo o fetileng, hoba ba bang ba ne ba re litlolo tsa molao li tlil’o fokotseha, haholo tsa bosholu ba liphoofolo, ha ba bang ba ne ba re a tlo ba hlorisa.

Mofuputsi oa litaba tikolohong eo, monghali Sepeka Makoae, o re sena se latela hore letsatsing le boletsoeng, ho fihle seroalankhana se neng se tšetse masole a mangata, ao ho utloahetseng a se a ilo hloma motebo-ntloana ka holim’a thaba ea Mpharane, hona Leribe.Leha ho le joalo, litaba tsena ha li e-so tiisoe ke ofisi ea Sesole sa Lesotho.

 

Likolo tse ntseng li ruta lithuto tsa ICM, li laeloa ho emisa hang-hang

Mongolisi oa likolo tsa mesebetsi ea matsoho lefapheng la TVD Lekaleng la Thuto, o re likolo tsohle tse ntseng li ruta lithuto tsa ICM, li emise tšebetso ea tsona hang-hang, hoba Lekala le sa buisana le ICM holim’a lithuto tsa eona.

 

Monghali Steve Thabo, o re ho fihlela Lekala la Thuto le qetile ka lipuisano tsa lona le ICM, ha ho na sekolo se lumeletsoeng ho ruta lithuto tsa eona, ’me e-bang se teng, se emise pele se ka nkeloa likhato tsa molao. 

Sena monghali Thabo, o se buile a ipapisitse le seboko sa phohomela sa IBC College, se reng sekolo sa LIPS se utsoa baithuti ba sona ka thetso ea hore IBC College e se e sa rute lithuto tse ananeloang ke machaba.

Leha ho le joalo, monghali Thabo o itse ka ha Lekala le fane ka taelo ea hore sekolo sa LIPS se ke se tšoare lithuto tsa ICM ho se hokae, e tla etsa liphuputso tsa lona ho fumana hore efela se emisitse kapa che, ’me Lehakoe la Litaba le khutlele ho Lekala ka Labone la beke ena.

O re sekolo sa IBC College se ngolistsoe ka molao le TVD, ha sa LIPS se ntse se qetela litlhopho tsa sona ho ingolisa.

Setloholo se ea lebollong se sa tsebisa lelapa la habo sona, Quthing

Monna oa Lower Moyeni, Ha-Sikara, Quthing, o re motsoali oa hae o tšoentsoe ke ho ea lebollong ha setloholo sa hae se kaholimo ho lilemo tse mashome a mararo, se sa tlalehela lelapa.

Monghali Lefa Mafantiri o re ’m’ae o tšoenngoa ke sena, hobane se seng sa litloholo tsa hae se kile sa ikisa lebollong, sa tsietsana se le hona teng ka selemo sa 2014, sa potlakisetsoa sepetlele Mohalesuku, lelapa le sa tsebe.

O re lelapa le ne le tsebisoe ke e mong oa babolli ha setloholo seo se se se timetse, joale ea e-ba hore na ke ka mabaka afe le sa behoang leseling ka bokulo ba sona, ha e le mona le se le bolelloa ha se se se shoele, ’me kenya-kenya ea sallana le lona.

Monna o patlong ea e mong, Mokhotlong

Moahi oa Matsoaing Ha-Ramoqane Kubutu, Mokhotlong, o re o patlong ea monna oa Tsoenene Ha-Maama Letsie, ea ileng a nyamela a ne a ile tlung ea mothamahane ka Sontaha se fetileng.

Monghali Poloko Mojapela, o re monna eo, o ne a ile tlung ea mothamahane,’me eena o ile a mo siea teng, empa ha a khutla ho ea mo lata ka shoalane, a se ke a mo fumana ho fihlela ka Lapele lena.

Mabitso a monna ea boleloang ke Moroke Morojele, e molelele ka seemo, o mosootho ka lebala, ’me o nyametse a tenne borikhoe bo bosoeu, a apere baki e ntšo, a roetse katiba ea ulu e tala, a roetse litopo tse tala le ho apara kobo e thokoa.

Khotsang Moshoeshoe o re boipuso ba Lesotho bo lekeke

IMG_20181021_215117_215

Monghali Khotsang Moshoeshoe o re o ananela Lesotho le na le boipuso le hoja e le bo lekeke, e se bo neng bo tsekelloa ke Mahatammoho e leng bo neng bo lokela ho tla le naha ea Basotho, e hapelletsoeng ka Afrika-Boroa.

O re bona bo lekeke, bo ile ba fihlela matsohong a ba neng ba se na leano le hlakileng la khaho le ntšetsopele ea moruo oa Lesotho. Maikutlo a hae ke hore babusi ba joale, ba batlane le leano la moruo la sehatammoho, le neng le okhile matla a lona ho la Moshoeshoe la Matsema le Lefisa, e leng le ka bitsoang likoporasi ha ho tluoa secheng sa joale.

Tsena, o li buile lenaneong la Moafrika fm la Rentša-lephola, hoseng ha Lapele la beke ena, moo a neng a botsitsoe maikutlo malebana le boipuso ba naha ena, ha e le mona re saletsoe ke matsatsana ho ketekoa lilemo tse mashome a mahlano a metso e meraro tsa bona.

Morena Sebonomoea sa Bobeli, o ne a ile a hana ho bua ka bona a re ke taba e hlokang batho ba Lekhotla la Bafo, boetellipele ba BCP le ba ABC ka le reng, ba Lekhotla la Bafo ba re Basotho ba phoqiloe feela ka sena see ba se bitsang boipuso.

A re Lekhotla leo, le bo bitsa hlooho ea tšoene e filoeng Basotho e furalalitsoe ho thoe kea nku, a ba a re Moetellipele oa BCP, Ntsu Mokhehle o ne a be sieo nehelanong eo ea boipuso ka lona lebaka leo. Ka mokhoa o joalo Lekholokoe la re moetellipele oa Kobotata le eena o ne a hane ho keteka lilemo tse mashome a mahlano tsa bona.

Letsosa o re paramente ea Lesotho e koetsoe ka mabaka a sa tsejoeng

Min-of-Education-Motlalentoa-Letsosa-1

Monghali Motlalentoa Letsosa, o re taba ea hore Paramente ea Lesotho e koetsoe ka mabaka a sa tsejoeng, ho makalitse bohanyetsi, hobane bo ne bo lumela hore e tla ba e se e butsoe, ho ntšetsapele mesebetsi ea sechaba.

O re e ne e lokela hore e be e se e butsoe mathoasong a khoeli ena hobane ho ne ho khutloa Mariheng, empa ha ho joalo, ke ka baka leo a reng ha ho tsejoe na e ntse koetsoe hobaneng.

Tsena monghali Letsosa o li buile a ipapisitse le litaba tsa Engelane tse reng Lekhotla le leholohali la naha eo, le hanana le Tonakholo ea eona, Boris Johnson, malebana le ho koaloa ha Paramente ka mokhoa oa Prorogation.

Lekhotla le itse Prorogation eo, e sitisa Paramente ho etsa mosebetsi oa eona oa mantlha,ka lebaka leo la e lahla, e leng ho thabisitseng bohanyetsi haholo.

Khefutso eo ea Paramente, e ne e ile ea etsoa ke tonakholo e le boitokisetso ba ho khannela naha eo moo e tlang ho monyoha ka har’a kopano ea linaha tsa Juropo, mafelong a Mphalane ea monongoaha. RK

Molebeli o lelekoa ka lebaka la mookameli ea mo loants’itseng

Monna oa Phahameng Ha Jobo Lerotholi Mokhotlong, ea sebetsang Hlotse e le molebeli, o re o lelekelloa mookameli oa hae ea mo loantšitseng.

Monghali Tankiso Sekhutšoanyane, o re sena se latela hore mookameli oa hae a mo etsetse litšoso tsa hore o tla mo khakhatha hampe, empa eena a mo hlokomelisa bokotsi ba see a batlang ho se etsa.

O re ho feta moo, mosebetsi-’moho le eena o mo etselelitse ka hore ha a theohele mosebetsing nakong ea motšehare, le hoja a re eena o kena tšebetsong bosiu, ’me o ile a tlaleha litaba tsena bookameling bo boholo. 

O re ho e-na le hore bookameli bo sebetse taba eo, bo se bo mo laetse hore a tlohe Hlotse a tle Maseru, ’me ha a botsisisa mabaka a seo, ha a fuoa ntlha.

Leha ho le joalo, motsamaisi k’hamphaning ea Tšireletso ea Tšemeli, monghali Makoae Sekoala, o re litaba tsa molli ha se tsa ’nete, ho teng, ke motho ea sieang mosebetsi a ikele likoloing tsa baeti, moo ho utloahalang e le sepeketere teng.

Letsosa o re paramente ea Lesotho e koetsoe ka mabaka a sa tsejoeng

Min-of-Education-Motlalentoa-Letsosa-1

Monghali Motlalentoa Letsosa, o re taba ea hore Paramente ea Lesotho e koetsoe ka mabaka a sa tsejoeng, ho makalitse bohanyetsi, hobane bo ne bo lumela hore e tla ba e se e butsoe, ho ntšetsapele mesebetsi ea sechaba.

O re e ne e lokela hore e be e se e butsoe mathoasong a khoeli ena hobane ho ne ho khutloa Mariheng, empa ha ho joalo, ke ka baka leo a reng ha ho tsejoe na e ntse koetsoe hobaneng.

Tsena monghali Letsosa o li buile a ipapisitse le litaba tsa Engelane tse reng Lekhotla le leholohali la naha eo, le hanana le Tonakholo ea eona, Boris Johnson, malebana le ho koaloa ha Paramente ka mokhoa oa Prorogation.

Lekhotla le itse Prorogation eo, e sitisa Paramente ho etsa mosebetsi oa eona oa mantlha,ka lebaka leo la e lahla, e leng ho thabisitseng bohanyetsi haholo.

Khefutso eo ea Paramente, e ne e ile ea etsoa ke tonakholo e le boitokisetso ba ho khannela naha eo moo e tlang ho monyoha ka har’a kopano ea linaha tsa Juropo, mafelong a Mphalane ea monongoaha. RK

Moafrika e tlabotse selekane le Lehae la Basotho

Moifo oa Moafrika FM o neng o etelletsoe-pele ke Mohlomphehi Mohlophisi e moholo, ea neng a aperoe ke libini tsa Gospel le tsa Famo, o khutla Khauteng o tlabotse selekane le Lehae la Basotho Trade Union.

Selekane sena, se tla nolofaletsa Basotho ba ka mona ka hae le ba ka Afrika Boroa ho kopanela mathata a bona a fapakaneng.Pontšo ea kopano eo,e tla bonahala moketeng oa Lipapali oa Moafrika,oa Teboho,Qoatsaneng,Maseru,mafelong a beke ea boipuso ba monongoaha.

Mokhahlelo oa bobeli oa baphaphathehi ba neng ba le RSA, o kene ka har’a naha

Mokhahlelo oa bobeli oa baphaphathehi ba neng ba le Afrika-Boroa ba balehisitse bophelo ba bona ka mabaka a fapakaneng, o kene ka har’a naha hoseng ha Laboraro lena.

A bua lenaneong la Masutsa la Laboraro lena, monghali Teboho Sekata, o re sena se tsoetsoe ke tumellano e bileng teng lipakeng tsa LCD le ’muso botenng ba SADC, nakong ee moetellipele oa Nonyana e kholo a neng a khutlela Lesotho. Ho se ho setse mokhahlelo oa boraro, oo a lumelang hore o tla kena haufinyane.