Paramente e simollotse tlhahlobo ea molaoana oa boea

Paramente ea Lesotho e simollotse mosebetsi oa matsatsi a mahlano a ho hlahloba molaoana oa nomoro ea mashome a tšeletseng a metso e mehlano, o laolang theko le thekiso ea boea ba linku le lipoli. Tlhahlobong eo, ho tla be ho hlahlojoe hore na o sebelelitse Basotho joang.

Liphuputso tse simollotseng ka labobeli la khoeli e holimo, li lekanyelitsoe ho fela ka la leshome le motso o le mong la khoeli eona ena ea Phupu.

Lihlopha tse lebelletsoeng ho thusa komiti tšebetsong ena ke mokhatlo oa Lesotho oa boea, lekala la kholiso ea likhoebo tse nyenyane, setsi sa boea sa Thaba-Bosiu, lekala la khoebo le mesebetsi e meholo, Masianokeng Brokers, BKB le komitjana ea paramente litabeng tsa boea.

 

Kamor’a ho utloa monghali Teboho Sekata, a hlalosa tšebetso ena, lenaneong la Masutsa la MOAFRIKA ka Labobeli la beke ena, bamameli, e leng ba amehang ka kotloloho le ba sa ameheng ka kotlolo, ba ile ba bua ka matla, ba re ntho e hlokahalang e ’ngoe feela, ke hore molaoana oo o hlakoloe litaba li fele.

 

Ba bile ba re, kamor’a ho hlakoloa ha molaoana oo, bohle ba hantsoeng tefong ea boea ba bona, ba buseletsoe sohle se ba lokelang.Ba ithuisitseng ka lichelete tseo, ba phatlalatsoe ba be ba li hlatsisoe.E tla ba toka e abiloe.