Rankulikae o re Thaba-Bosiu e mo ketleutse ha bohloko

Rankulikae oa Thabana-Morena Ha-Turupu, Mafeteng, o re o ipone hore ke monna ea matla, haeba ha a ka a ilibana ha a bona fono ea hae ea letsoho e mo tlalehela hore chelete ea hae ea boea ke makholo a robong a metso e robong a Maloti, ka Labone le fetileng.

Monghali Antone Leferesane ea kutelang sekiring sa Thabana-Morena, o re o makaletse chelete e kaalo, feela a kutile linku tse mashome a tšeletseng a metso e supileng.

O re mokutong oa selemo sa 2017, o ne a fumane likete tse leshome le metso e supileng a ne a kutile linku tse mashome a tšeletseng a metso e tšeletseng, ’me o re Thaba-Bosiu, e mo ketleutse ha bohloko.