’Muso o kokomosa mosafeleng tabeng ea boea

agriculture-animals-baby-288621

Basotho ba re ’muso oa naha ena o imetsoe sa motho ea seng a bile a roetse lejoe ke ho imeloa ke lethethe, kapa phoofolo e faretsoeng, ’me ho kokomosa ha oona ha ho o tsoele molemo, o se o hloka motho ea ka o thusang ka matsoho.

Tsena, ba li buile lenaneong la Puo ea Sesotho ka Labone lena, moo ho neng ho tšohloa lentsoe Kokomosa/Kὀkὀmosa, le ts’ebeliso ea lona moo ho ileng ha hlahella hore tlhaloso ea lona ea pele ke ho kenyakenya kilibitlahali, nthoa tona, e akhang ho leka ho tlosa, ho phahamisa kapa ho ithoma.

Tlhaloso ea bobeli e bile hore ke taelo, ho motho eo ea imetsoeng, eo ho kokomosa ha hae ho utloahalang hole, etsoe a kokomosa mosafeleng. Ba re motho ea joalo, a ka thusoa ka ho laeloa hore a kokomose ka matla kapa a fatoe ka morao, kapa a kenngoe matsoho, ho honyolloe ntho eo e faretseng.

Tabeng ea hore ’muso oa Lesotho ke oona o kokomosang ntho e seng ka ka letho, Basotho ba itse o faretsoe chelete ea lihoai tsa boea, makhotla a boahloli le oona a hlalositsoe a kokomosa mosafeleng linyeoeng tsa ABC Kobotata, ha eona ABC-Kobotata e faretsoe seboka sa eona sa Lehakoe.