Molebeli o amohuoa sethunya ke litlokotsebe, Mafeteng

Molebeli oa e ’ngoe ea likhoebo tse toropong ea Mafeteng, o re litlokotsebe li mo amohile sethunya sa mosebetsing oa hae nakong ee li neng li e hlasetse ka Labobeli la beke ena.

Monna ee Lehakoe la Litaba le itšebileng le eena, o re banna ba babeli ba neng li tšoere lithunya, ba ile ba mo fumana a le monyako oa khoebo, ba mo laela ho fana ka sa hae, ba nto mo suthumeletsa ka hare le ho mo paqamisa ba ntse ba khabolisa lithunya.

O re kamor’a moo, ba ile ba baleha, mong’a khoebo eena a potlakisetsoa sepetlele sa hona Mafeteng moo.O re ho utloahala a fetiselitsoe ho sa Queen ’Mamohato, ’me ha ho e-so be le motho ea tšoeroeng malebana le ketsahalo eo.